جیران یئردن آیاغینی قوش کیمی اوزوب،
یای کیمی دارتینیب اوخ کیمی سوزوب،
یئنه ئوز سورونی نظاملا دوزوب،
باش آلیب گئدیرسن هایانا، جیران؟
ازلدن میلینی سالیب چوللره،
بختینی تاپشیردین بیزیم ائللره،

  آردی وار


او قارا گوزلرین دوشدی دیللره،
دیشلرین اوخشاییر مرجانا، جیران!
بیر مثل قالمیشدیر آتا – بابادان،
اوچاردا توراجدیر، قاچاردا جیران.
بیر من دگیلم کی، حسنونه حیران،
شهرتین یاییلیب هر یانا، جیران!
سکوتا غرق اولموش اورگیمله
من کئچیرم یئنه ده موغان چولوندن،
یانیندا بالاسی، یاغیش گولوندن
اگیلیب سو ایچیر بیر آنا جیران،
ائله کی، سون بهار مین بساط قورور،
کوللاری – کوسلاری ییغیب اوچورور،
سخناشیب بیر یئره، باش – باشا دورور
دوشنده چوغونا، بورانا جیران.
اون آددیم کناردا یاتماییر تکه،
گزینیر، اویلاغا باش چکه چکه؟
گلن قارالتیدیر، یوخسا تهلکه؟
بیر ئوزونه باخیر، بیر اونا جیران.
اوچی، اینصاف ائله، کئچمه بو دوزدن!
او چوللر قیزینی آییرما بیزدن!
قویما آغری کئچه اورگیمیزدن
- قییما ئوز قانینا بویانا جیران!
نه گوزل یاراشیر موغانا جیران!

 

منبع: وبسایت مغان ارس